రియల్ ఎస్టేట్‌ రంగంలో టెక్నాలజీ విప్లవం.. ఏఐ వాడకంలో భారీ పెరుగుదల

భారత రియల్ ఎస్టేట్ రంగం భవిష్యత్తులో అద్భుతమైన వృద్ధిని సాధించనుందని, 2047 నాటికి ఈ మార్కెట్ విలువ ప్రస్తుతంతో పోలిస్తే దాదాపు 9 రెట్లు పెరిగి 5.8 ట్రిలియన్ డాలర్లకు (సుమారు 49 లక్షల కోట్ల రూపాయలు) చేరుకుంటుందని ఫిక్కీ-కేపీఎంజీ సంయుక్త నివేదిక అంచనా వేసింది. 'Reimagining India’s Real Estate Landscape' పేరిట విడుదల చేసిన ఈ నివేదిక, టెక్నాలజీ వినియోగం ఈ వృద్ధికి కీలక చోదకశక్తిగా నిలుస్తుందని స్పష్టం చేసింది. రియల్ ఎస్టేట్‌లో టెక్నాలజీ విప్లవం వస్తోందని, ఏఐ వాడకంలో భారీ పెరుగుదల నమోదవుతోందని తెలిపింది.

ప్రస్తుతం 2025లో భారత రియల్ ఎస్టేట్ మార్కెట్ విలువ 650 బిలియన్ డాలర్లుగా (సుమారు 5.5 లక్షల కోట్ల రూపాయలు) ఉంది. ఇది దేశ జీడీపీలో 7.3 శాతం వాటాను కలిగి ఉంది. నగరీకరణ, పెరుగుతున్న ఆదాయాలు, సంస్థాగత పెట్టుబడులతో పాటు సాంకేతికత వినియోగం పెరగడం ఈ వృద్ధికి ప్రధాన కారణాలని నివేదిక పేర్కొంది.

రియల్ ఎస్టేట్ రంగం ఇప్పుడు సాంప్రదాయిక పద్ధతుల నుంచి డిజిటల్ వైపు వేగంగా అడుగులు వేస్తోంది. ముఖ్యంగా ఆర్టిఫిషియల్ ఇంటెలిజెన్స్ (ఏఐ), డిజిటల్ ట్విన్స్, బ్లాక్‌చెయిన్, డ్రోన్లు వంటి టెక్నాలజీల వినియోగం పెరుగుతోంది. కార్పొరేట్ రియల్ ఎస్టేట్‌లో ఏఐ వాడకం 2023లో 5 శాతం కంటే తక్కువ ఉండగా, 2025 నాటికి అది ఏకంగా 91 శాతానికి పెరగడం గమనార్హం.

పెరుగుతున్న నిర్మాణ వ్యయాలు, కఠినమైన నియంత్రణలు, పారదర్శకత కోసం కొనుగోలుదారుల నుంచి వస్తున్న ఒత్తిడి వంటి కారణాలతో కంపెనీలు టెక్నాలజీని అందిపుచ్చుకుంటున్నాయి. 'వికసిత భారత్' లక్ష్య సాధనలో ఉపాధి కల్పన, ఆర్థిక వృద్ధికి రియల్ ఎస్టేట్ రంగం కీలక పాత్ర పోషిస్తుందని నివేదిక అభిప్రాయపడింది. వివిధ మార్గాల ద్వారా ఇప్పటికే 16 బిలియన్ డాలర్లకు పైగా మూలధనం అందుబాటులోకి రావడం కూడా ఈ రంగంలో పారదర్శకతను పెంచుతోంది.